حالة اسأل الله الا تدوم معى او مع من احب

مـــــو جـــوعة اوى

و كأنه اخر وجع اللى لا ينفع تحس بعده بألم و لا اى جرح يأثر فيك

الغريب ان ده مش اول مرة احسه بس فى كل مرة كان بيوهمنى انه آخر وجع و ارجع تانى اتوجع

النهاردة افتكرت ايام كنت نسيتها ...عشتها و تعايشتها و مصدقت الدنيا تلعب لعبتها معايا و تاخدنى فى دوامتها بس النهاردة عشتها من تانى بكل تفاصيلها و مكنتش مجرد ذكرى كانت حقيقية اوى .. بشكل يوجع

يارب بلدى يارب

هو انا الوحيدة اللى فى البلد دى اللى مش عارفة تنام ياربى ليه مبقتش باردة كده و ضارباها جزمة كان لازم اطلع دمى حامى و غاوية تعب قلب خلاص يعنى ما بقالى 23 سنة تحت حكم حسنى كان حصل ايه يعنى ؟ و ايه المشكلة لو اخدنا قرار و طلع غلط و الدنيا اتبهدلت ها هيحصل ايه ؟ و الا لما اتشل و لا تجينى جلطة البلد دى هتنفعنى بإيه ؟؟ 

يارب يارب يارب خليك معانا يارب مصر فوضت امرها اليك اكفيها شر الفتن و المحن يارب

اللهم يارب كل شئ بقدرتك على كل شئ زين فى عينينا الافضل و اختار لنا الافضل يارب مالناش غيرك 

لا اله الا انت الرحمن الرحيم 

لا اله الا انت الحليم العظيم 

سبحانك رب العرش العظيم 

اسألك ربى بموجبات رحمتك 

ان ترحم اهل مصر من المجهول و تدحض دابر من يريد بهم سوء

يارب بلدى يارب 

الدنيا لسه فيها اكتر

بحب اوى اعلانات اتصالات على الرغم من انى فودافونية قديمة من ساعة ما مسكت نوبايل فى ايدى و انا رقمى حتى مغيرتهوش مش عارفة ليه احنا ارباب فودافون بيبقى صعب علينا التغيير انما منكرش ان اعلانات اتصالات بتلهمنى و خاصة فى الفترة الاخيرة تحت شعار ( الدنيا لسه فيها اكتر ) اعتقد انه شعار يستحق ان نتبنى معناه فى حياتنا علشان نقدر نكمل ما هو لو افتكرنا ان الدنيا هى كده اخرها هنعيش ليه ؟؟!! زى بالظبط لما تيجى تقولى هترضى عن نفسك امتى ؟ ما انا لو رضيت عن نفسى ده معناه انى وصلت لاقصى احلامى و اقصى امنياتى طيب هعمل ايه فى حياتى لو فى العمر بقية فلازم دائما اقول لنفسى الدنيا لسه فيها اكتر و الحياة لسه فيها اكتر و انا لسه عايزة اكتر و اعتقد انه طمع مشروع طالما حياتى دى هعيشها صح و فى غير معصية 

دايما بقول لنفسى صدقى تصدُقى تتصدقى كل الحكاية انك تؤمنى بالشئ و تصدقي انه ممكن يحصل هتلاقيه فعلا حصل مش لمجرد انك صدقتى بس لان الايمان بحدوث الشئ بيعطى دفعة انك تخليه واقع ملموس و فى الحالة دى هتلهمى الاخرين بالايمان بصدق حدوثه و لما انت و غيرك تؤمنوا يبقى خلاص بقة حقيقة ...

وساعات فى كلام بيجيب فى كلام واضحك واشتاق واخاف

 وساعات اكتب فى رسايل بلا اقلام لا رصاص ولا جاف

 وساعات فى صور بتحركنى بتجينى لو كنت انا فين

صناديق الدنيا هتفتح لو صدقت معاك مفتاح

ياحبيبتى بتسالى دايما كام شخصيه بشوفها انا فيك

 انا اكتر من شخصية وكل مافيا بيحلم بيكى

ماشوها عيد سعيد

صباح العيد

اانا شيلت ايدى من اللحمة و جيت اسجل نقطة مهمة جدا  للتاريخ  

محدش يعيد عليا و يقولى عيد مبارك و لا يا جمال العيد يا محلاه علاء و اخوه وياه

لالالالالالالالالالالالالالا ماشوها عيد سعيد و اهو يمكن سعيد يكون اللى عليه العين بس انا قلت اهو

هيه هيه هيه العيد فرحة و كمان لحمة هيييييييييييييه

كل ما كلم حد يقولى مش حاسس بفرحة العيد و يحكيلى مشاكل الدنيا و الاخرة

و انا اللى اعتبر فى حد ذاتى مشكلة مش بحس كده الحمد لله بالعكس دايما بحس ان فرحة العيد و بهجتها بتفرض نفسها يااااااااااااااه اما العيد ده حلو بشكل

اولا مبنمش خاااااااااااااااااااالص ليلتها و ببقى حاسه بفرحة غير عادية و اقعد الف طول الليل زى الفرقع لوز و مبخليش حد ينام ، يناموا ازاى يا جماعة بكرة العيييييييييييييييييييييييييييييييييييييييد

اجمل حاجة بقى بالنسبة لى هى صلاة العيد يااااااااااااااااااااااااااااااااااه مبحسش بالعيد من غيرها و اغنية صفاء ابو السعود و هى شابكة دستة عيال ببلونتهم  فى فستانها و عمالة تقول اهلا اهلا بالعيد مرحب مرحب بالعيد هيه هيه هيه ههه هيه و الخروف و اللحمة و هدت الحيل اساسى يا باشا  بس كلك على بعضك حلو 
 و خروجى عند اهلى و العيدية ( لا انا عيلة اوى فى الحاجات دى ) و بعدين اتجمع انا و صحابى و نخرج بقى و غالبا اول يوم بنتمشى و بعدين نقرر نروح سيما محتارين السنة دى نروح فيلم احمد و لا الحاج احمد ( الاول حلمى و التانى السقا علشان متفكرش كتير )

المهم ان مدة العيد تتملكنى حالة من الانشكاح غير طبيعية و غالبا لا بفكر لا فى مشاكل و لا يحزنون اكيد دى نفحات الرحمن على المساكين من عباده امثالى يعنى عيشيلك يومين يا بت يا ياسو بس نفسى الفرحة دى تلزق شويا معايا كمان كام يوم

كل سنة و انا طيبة و كل اللى بحبهم طيبين سواء بيحبونى هما او لا و هعيد على كل اللى بحبهم سواء فاكرنى و لا لا تقريبا دى تبعات الحالة الانشكاحية

و كل سنة و كل الناس طيبين و يارب ميجيش العيد على حد و ميكنش سعيد

 و يارب اوعدنى بزيارة حبيبك النبى عليه افضل الصلاة و السلام

كتر يارب فى اعيادنا و اطرح فيها البركة و زيد

اللهم امين

جدو اول عيد من غيرك و تانى عيد من غير تيتة مهما كبرت فرحتى اكيد ناقصة و مهما كانت سعادتى بيكم كانت احلى بدعيلكم دائما بالرحمة و بادعى لنفسى بالعزاء

ياسمين ياسر

يا ليلة العيد آنستينا

15 / 11 / 2010 

من هنا و رايح هبتسم يا عم سيد

عم سيد مااااااااااااااات

مين عم سيد اصلا يا بنتى ؟؟؟

عم سيد هو هذا الرجل الاسمرانى اللون شديد النحول الذى لم اعهده يوما الا و تلك الابتسامة لا تفارق شفتيه ، كنت اندهش اندهاشة مندهشة - و شوف انت بقى لما الاندهاشة ذات نفسها تكون مندهشة - من سر تلك الابتسامة

و خاصة ان عم سيد بائع للجرائد بسيط فكنت عندما انظر لحاله و تلك الملابس الرثة التى لا يبدلها صيفا و لا شتاءاً و كيف يقتات رزقه و قوته من بيع الجرائد و ليس لديه مصدر رزق اخر اتساءل كيف يقوى على الابتسام و انا استشيط غضبا لابسط الاشياء ده غير انى اشعر بأنى سأصاب بأزمة قلبية او لوثة عقلية بمجرد قراءة تلك الجرائد التى يبيعها فكيف يفعلها بالله عليه ؟؟؟ 

و برغم الفضول الذى كان يجتاحنى الا انى لم اسأله يوما هذا السؤال و هذا لانى لم اكن لاجازف بأن اسمعه يجيب الاجابة النموذجية المعتادة بعد ان يتنهد تنهيدة حارة تكفى لاذابة الجليد ( يعنى هعمل ايه يا استاذة ما انا لو مضحكتش هطق من جِنابى .. ) لا دعونى اتخيل ان هناك اشخاص سعيدة و تبتسم لمجرد ان الحياة بقى لونها فوشية و هكذا كان عم سيد بالنسبة لى اخر الرجال المبتسمين !!

على مدار 6 سنوات منذ ان دخلت الكلية و انا امر كل يوم على عم سيد - مش ملاحظين ان دائما ما يكون اسمه عم سيد - و يدور بيننا الحوار التالى :

صباح الخير يا عم سيد 

صباح الورد .. منورة الدنيا يا استاذة ايه الاخبار ( و هو مبتسم )

و الله الاخبار و الاهرام عندك انت

ها زى كل يوم يا استاذة ( و هو مبتسم ... الراجل ده بيغظنى و لا ايه !! )

زى كل يوم يا عم سيد

و يعطينى طلبى المعتاد الدستور ( ايام ما كان فيه دستور ) و المصرى اليوم ( و هو مبتسم .. لا ده استنصاد بقى )

و اعطيه انا الجنيهين و هموت و اقوله بتضحك على ايه يا راجل انت ؟؟

على مدار 6 سنوات كانت مساحته فى حياتى لا تتعدى 5 دقائق كل يوم اى 76650 دقيقة على مدار تلك السنوات الست و اليوم فقط مررت و لم اجده فى مكانه المعتاد و عندما سألت قال لى رجل يبيع الخضار ( الدوام لله )  ... تنحت للراجل ايوة تنحت و سألته سؤال معوق ( يعنى ايه ؟؟ ) ، ( يعنى تعيشى انتى قابل وجه كريم ) و لسان حاله دى عبيطة دى ولا ايه !!

عم سيد لا اعلم اذا كنت تعلم و لكنك على مدار 6 سنوات كنت اكثر من مجرد بائع للجرائد ، كنت مصدر الهام لى فى احيان كثيرة و لكنك رحلت قبل ان اعلم كيف كنت تفعلها ، كيف كنت تقوى على الابتسامة فى زمن اغتصب اجمل ما فينا .. زمن ضاعت فيه المفاهيم  

اااااااااه عم سيد بتاع الجرايد ... هكذا قالت صديقتى

طيب و انتى مالك مذبهلة ليه ؟؟

نظرت لها و لم ارد لان حتى لو رديت ... هتفهم

عم سيد

سأمر على مكانك فى طريقى كل يوم و لن اجدك او ربما سأجد شخصا اخر محلك

و لكنى سأتذكرك ... و ابتسم 

ياسمين ياسر

يوم الثلاثاء

2 / 11 / 2010

كل 23 سنة و انا طيبة

زى النهاردة من 23 سنة انا جيت .... الايام بتجرى بسرعة بشكل ، بقى انا بقالى 23 سنة عايشة يا قوة الله !!!!!!

زمان و انا عندى ييجى حداشر اتناشر سنة كنت حاسة انى  اوصل ل 20 سنة بعييييييييييدة اوى و كنت متخيلة انى لما يبقى عندى 20 سنة دا ياااااااااااااااه ههد الدنيا و ابنيها تانى على مزاجى و لما وصلت لل 20 لقيت الدنيا هى الدنيا و لا هديت و لا بنيت و الحال هو الحال بس انا ما انكرش انى اختلفت كتير عن زمان و اتعلمت حاجات كتير و اهم حاجة انى اتعلمت احب الحياة و انى مخفش من بكرة و مخفش من حد غير اللى خالقنى و يكون عندى امل و ثقة فى الله ان اللى جاى احسن و ان اللى متحققش النهاردة لسه فيه بكرة و اللى ميتحققش بكرة لسه فيه بعده و بجد الحمد لله على اجمل نعمة ربنا انعم بيها عليا انى لسه قادرة احلم و كل يوم بيتولد جوايا حلم اكبر و اجمل و احلى

كل سنة و انا طيبة
 و الاهم كل سنة و الناس اللى بحبهم طيبين و حواليا و بيحبونى فى الله و بحبهم ودى امنيتى للعام الجديد و هضيف عليها امنية هذا العام و كل عام وهى : ( نفسى احب نفسى اكتر من كده لانها محتاجة منى انى احبها و لانها تستاهل انى احبها و اى حاجة تانية هتبقى سهلة بإذنك يارب )

ياسمين ياسر

20 - 10 - 2010