حسين افندى ابن الحج وهدان لا يمكن يكون من الاعداء

حتى هذه اللحظة التى اكتب فيها تلك السطور 7 قتلى حصيلة ثورة اندلعت منذ الامس  و هى انتفاضة الشعب المصرى وحده دون غيره من المنافقين و المتسلقين الذين يريدون اغتصاب الثورة من اجل مصالحهم الشخصية 

بعيدا عن كل الاحداث المشتعلة و الاخبار المؤسفة خاصة من السويس و انا اتابع الاحداث اول بأول اذ بخاطر يأتينى و سؤال يلح على : 

مين بيضرب مين و لمصلحة مين ؟؟؟!!!! الضارب و المضروب الاتنين من نفس النسيج و من نفس الارض و عايشين نفس المعاناة ودايقين نفس الذل

يبقى ليه و لمصلحة مين اخ و اخوه يقفوا وجها لوجه .... لا حول ولا قوة الا بالله

و لقيت نفسى بدور على مقطع الفيلم الرااائع ( البرئ ) و احمد سبع الليل يدافع عن حسين ( ده حسين يا سعادة الباشا انا عارفه اصل احنا الاتنين من بلد واحدة و مولودين فى جمعة واحدة و ابوه الحج وهدان راجل واحد من اكابر البلد راجل متقى و يعرف ربنا و يتحط على الجرح يبرد حسين افندى ابن الحج وهدان لا يمكن يكون من الاعداء ، اعداء اعداء ايه ؟!!!! ده هو اللى فاطمنى و نورنى و قالى على مهمتى فى الجيش 

رسالتى لكل من الضارب و المضروب خدوا بالكم ....

حسين افندى ابن الحج وهدان لا يمكن يكون من الاعداء

و اى افندى واقف قدامك دلوقتى بيهتف ( الشعب يريد اسقاط النظام ) فهو يهتف لك و له ولا يمكن يكون من الاعداء

و اى مجند واقف قدامك اغلب منك و الهم زى ما هو طايلك طايله و لا يمكن يكون من الاعداء