شاغلنى كتير السؤال ده
ايه الفرق بيننا و بينهم ؟!!
انهم اهتموا ببناء الانسان ..... و احنا تفننا فى هد الانسان
انهم آمنوا بالحريات ..... و احنا اخترعنا انواع جديدة للقيود
انهم بيسعوا ليكونوا الافضل .... احنا ارتضينا بأن نكون فى المؤخرة
ان عندهم ديمقراطية .... احنا انفردنا - اللهم لا حسد - بالفرعونية حكم الواحد للرعية اللى هما احنا
و الاهم
ان رئيسهم بيعرف يلبس الجزمة لوحده - سبحان الله - ... انما احنا لكل بيه عندنا جزماتى - على وزن قرداتى - شايله الجزمة و بيلبسهاله
يا اختى كميلة يا ناس
يا ناس يا شر كفاية قر
الاخ المحترم اللى بيلبسه الجزمة حاجة من اتنين :
يا اما دى شغلته عافانا و عافاكم الله يعنى بياخد مرتبه على الجزمة و هو ارتضى بكده الله يباركله
يا اما ده واحد من الجماهير الغفيرة المحبة لاحمد بيه عز لله فى لله اى و الله
احتمال كبير اكون انا انسانة ظالمه و مفترية و كل الحكاية ان احمد بيه عز اتسرقت جزمته قبل كده و الجيش بيقولك اتصرف
اللى مش فهماه و مش عايزة افهمه ازاى حد ربنا يكرمه بإنه يكون انسان و هو يقبل يأكل لقمته مغموسه بالذل و الهوان مهما كانت الظروف ربنا موجود يا اخى اذا كان خلقك مش هيقدر يأكلك استغفر الله العظيم
اعتقد انى عرفت ايه الفرق بيننا و بينهم ؟
بالرغم من ان اغلب الدول بما فيها احنا حاربت و ناضلت علشان حريتها و فى سبيل ده كان فيه تضحيات كثير الا انهم قدروا قيمة الحرية دى انما احنا فرطنا فى حقوقنا بسهولة اوى و فضلنا الطريق الاسهل و هو اننا نمسك لكل جنابه الجزمة و لا عزاء للمستكينين
ليست هناك تعليقات:
إرسال تعليق